ԵՐԵՎԱՆ, 8 դեկտեմբերի․/Նովոստի-Արմենիա/. ՀՀ ԱԺ-ում կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանը, պատասխանելով «Հայաստան» խմբակցության պատգամավոր Էլինար Վարդանյանի հարցին, անդրադարձավ Ադրբեջանում պահվող գերիների հարցին՝ նշելով, որ այսօր էլ պատրաստ է իր որդուն հանձնել գերիների վերադարձի դիմաց։
«Ես էսօր էլ եմ պատրաստ իմ որդուն հանձնել գերիների վերադարձի դիմաց (Փաշինյանը նման հայտարարություն էր արել նաև հունիսին կայացած ԱԺ ընտրությունների նախընտրական քարոզարշավի ժամանակ, խմբգր․)», - ասաց Նիկոլ Փաշինյանը։
Նրա խոսքով՝ գերեվարման ամեն դեպք պետք է հետաքննվի և իր ասածում ոչ մի զարմանալի բան չկա.
«Ի՞նչն է էդտեղ զարմանալի։ Ես ոչ մի զարմանալի բան չեմ տեսնում, որովհետև կլինեն գերեվարման դեպքեր, որտեղ կոնկրետ քրեաիրավական հետևանք չի լինի, կլինեն դեպքեր, որտեղ քրեաիրավական հետևանքներ կլինեն։ Ամեն օր աշխատանք է արվում գերիների վերադարձի համար, բայց դա չի նշանակում, որ վերադարձան՝ հետաքննություն չի արվելու, իհարկե, արվելու է։ Արվել է, արվում է և արվելու է, իմ ասածների մեջ ինչն է տարօրինակ», - ասաց Փաշինյանը։
Դեկտեմբերի 7-ին համացանցում տեսանյութ է տարածվել, որտեղ Սիմոնյանը ռազմագերիներին անվանել է դասալիքներ և հայտարարել․ «Նրանք իմ համար չկան»։ Ավելի ուշ Սիմոնյանը հայտարարել է, որ այդ տեսանյութը մոնտաժված է։-0-