ԵՐԵՎԱՆ, 29 մայիսի./Նովոստի-Արմենիա/. Առաջին անգամ Հայաստանում մեկնարկել է Միլանի ակադեմիայի ֆուտբոլային Մանկապատանեկան ճամբարը, որը հնարավորություն կտա Հայաստանի մարզերի 160 պատանիների մարզվել աշխարհի լավագույն մարզիչների մոտ:
Միլանի ակադեմիայի մանկապատանեկան ճամբարը բարեգործական նախաձեռնություն է, որը կյանքի է կոչում Ամերիաբանկը: Նրան են միացել Հայաստանի առաջատար ապրանքանիշերը, ինչպիսիք են Team Telecom Armenia-ն, «Զանգեզուրի պղնձամոլիբդենային կոմբինատը» (ԶՊՄԿ) և «Տաշիր» ընկերությունների խումբը:
Ճամբարն անցկացվում է «Այսօր խփենք վաղվա գոլը միասին» նշանաբանի ներքո: Ճամբարին մասնակցում են Հայաստանի մարզերի 11-15 տարեկան տղաներ և աղջիկներ, որոնք հանդես են գալիս մարզային ակումբներում, մասնակցել են և աչքի են ընկել Հայաստանի ֆուտբոլի ակադեմիայի առաջնություններում և լավագույնն են իրենց խաղային դիրքերում:
Պատանիներին մարզելու համար Հայաստան են ժամանել Միլանի ակադեմիայի մարզիչներ Կլաուդիո Զոլան, Ամադեո Կատալդին, Լեո Մոզեսոն և Վիրիո Պերելին:
Միլայի ակադեմիայի մանկապատանեկան ճամբարում մարզվել են շուրջ 200 հազար պատանիներ՝ Իտալիայից, Մեծ Բրիտանիայից, Գերմանիայից, Չինաստանից, Ճապոնիայից, Թաիլանդից, Կանադայից և տասնյակ այլ երկրներից: Հայաստանում ճամբարն անցկացվում է երկու հերթափոխով՝ մայիսի 28-ից հունիսի 7-ը:
Ամերիաբանկի Մարքեթինգի և հաղորդակցության գծով տնօրեն Ռեբեկա Հակոբյանը հայտնեց, որ ակադեմիան կիսվել է իր փորձով աշխարհի բազմաթիվ երկրներում և առաջին անգամ ճամբար է կազմակերպում տարածաշրջանում: Նա ընդգծեց, որ մարզերի երեխաների ներգրավումը ընկերության բազմամյա ջանքերի շարունակությունն է այդ երեխաների ուսուցման գործում:
«Հաշվի առնելով այն, թե ինչ կարևոր է, որպեսզի մարզերում ապրող մարդիկ ավելի լավատեսորեն տրամադրվեն և այնտեղ ակտիվություն լինի՝ մենք կարծում ենք, որ մարզերի երեխաների ներգրավումը ևս խորհրդանշական նշանակություն կունենա», - ասաց նա ասուլիսի ժամանակ:
Հակոբյանն ընդգծեց, որ հետագայում նման նախագծերի գործարկման ժամանակ երևանցի երեխաները ևս կներգրավվեն, բայց այս դեպքում մասնակիցների սահմանափակ թվի պատճառով որոշվեց նախապատվությունը տալ մարզերի երեխաներին:
Միլանի ակադեմիայի Մանկապատանեկան ճամբարի համակարգող և կազմակերպիչ Լուկա Ամադեսին նշեց, որ ճամբարն առաջին անգամ կազմակերպվել է 1998թ.-ին, և այս տարի 7 հազար երեխա կմասնակցի ճամբարներին ամբողջ աշխարհում:
«Հայաստանում ճամբարը կանցկացվի երկու հերթափոխով՝ 5 օրով, մարզումները կանցկացվեն առավոտյան և երեկոյան: Խմբերից յուրաքանչյուրը կմասնակցի 10 մարզման», - ասաց նա:
Ամադեսին ընդգծեց, որ ճամբարը բաց է 6-16 տարեկան երեխաների համար՝ անկախ նրանց ֆուտբոլային հմտություններից և հնարավորություններից:
«Տասը օրում անհնար է պատրաստել չեմպիոններ, բայց մեր հիմնական նպատակն է սովորեցնել նրանց, որպեսզի նրանք կարողանան հետագայում ինքնուրույն զարգանալ և առաջ շարժվել ֆուտբոլային ճանապարհով: Միգուցե նրանցից ընդամենը 1%-ն ապագայում դառնա պրոֆեսիոնալ ֆուտբոլիստ, բայց մեր նպատակն է ոչ միայն մարզումները, մենք ուզում ենք մարդ կերտել», - ասաց նա:
Ամադեսին ընդգծեց, որ մարզիչներն ավելի քան բավարարված են երեխաների մասնակցության մակարդակով, նրանք ոգեշնչված են իրենց գործողություններով:
Միլանի ակադեմիայի Մանկապատանեկան ճամբարի տեխնիկական տնօրեն, գլխավոր մարզիչ Կլաուդիո Զոլան պատմեց, որ ճամբարի ընթացքում մարզիչները երեխաներին կփոխանցեն գիտելիքներ և հմտություններ: Նա նաև ուշադրություն դարձրեց այն հանգամանքին, որ առաջին անգամ է տեսնում գրեթե հավասար հարաբերակցություն ճամբարում մասնակցող տղաների և աղջիկների միջև:
«Կա կարծրատիպ, որ հայերն ուժեղ չեն թիմային մարզաձևերում, ավելի հաջողակ են անհատական մարզաձևերում: Բայց մենք ուզում ենք կոտրել այդ կարծրատիպը և վստահ ենք, որ կհասնենք մեծ հաջողությունների թիմային մարզաձևերում: Դա ևս մեկ քայլ է Հայաստանում ֆուտբոլի առաջխաղացման հարցում՝ որպես ամենաթիմային մարզաձև, նոր մոտեցումների ներդրման, միջազգային մարզիչներին հրավիրելու հարցում», - ընդգծեց Team Telecom Armenia ընկերության կոմերցիոն տնօրեն Կարեն Շաբոյանը:
ԶՊՄԿ-ի տեղեկատվության և հասարակայնության հետ կապերի բաժնի պետ Արայիկ Մարգարյանը նշեց, որ ճամբարը հնարավորությունների պատուհան է երեխաների համար, այն գոնե նրանցից մի քանիսի համար կդառնա դուռ դեպի եվրոպական ֆուտբոլի աշխարհ:
«Արարատ-Արմենիա» ֆուտբոլային ակումբի, «Տաշիր» ընկերությունների խմբի գործադիր տնօրեն Հրաչյա Պողոսյանը հույս հայտնեց, որ նախագծին մասնակցող մեծ թվով պատանիներ կկարողանան ստանալ միջազգային փորձ, խաղալ արտերկրում և հասնել իրենց նպատակներին:-0-
