ԵՐԵՎԱՆ, 27 հունիսի./Նովոստի–Արմենիա/. ՀՀ կառավարությունը հինգշաբթի նիստի ժամանակ ընդունեց պատգամավորների առաջարկը «Նվազագույն ամսական աշխատավարձի մասին» օրենքում փոփոխություններ կատարելու մասին, որով նախատեսվում է բարձրացնել նվազագույն աշխատավարձը։
Ինչպես նշեց ՀՀ աշխատանքի և սոցիալական հարցերի փոխնախարար Գեմաֆին Գասպարյանը, պատգամավորներն առաջարկել են բարձրացնել նվազագույն աշխատավարձը` 55 հազար դրամից դարձնելով 63 հազար դրամ։
Նա նշեց, որ փոփոխությունները պայմանավորված են քաղաքացիների կենսամակարդակի ավելացման անհրաժեշտությամբ, իսկ բոլոր հաշվարկները կատարվել են` հաշվի առնելով 2019թ.–ի առաջին եռամսյակում սպառողական զամբյուղի արժեքի միջին ցուցանիշը, որը հավասար է 63 550 դրամի։
Загружается новость ... "Лево"
«Սա փոփոխվող ցուցանիշ է, մենք արդեն 3 ամիս ուսումնասիրություններ ենք կատարում այդ ոլորտում, որպեսզի հասկանանք նվազագույն աշխատավարձի չափը։ Դրանց արդյունքներով անհրաժեշտ է 67,6 հազար դրամ, որպեսզի ընտանիքը չգտնվի աղքատության եզրին։ Ելնելով բոլոր հաշվարկներից` մենք առաջարկում ենք բարձրացնել նվազագույն աշխատավարձը մինչև 68 հազար դրամ», – ասաց Գասպարյանը։
Նա նաև նշեց, որ այսօր 45 հազար մարդ մասնավոր հատվածում և 35 հազար մարդ պետական հատվածում ստանում են նվազագույն աշխատավարձ` 55 հազար դրամ։ Փոփոխությունների շնորհիվ նրանց աշխատավարձը կբարձրանա 23,6%–ով։
Այս կապակցությամբ ՀՀ վարչապետ Նիկոլ Փաշինյանը կոչ արեց ուշադրություն դարձնել աշխատողների իրավունքների պաշտպանությանը սոցիալական անապահովության և այդ կապակցությամբ աշխատանքի ժամերի ավելացման (մասնավոր հատվածում) հնարավորության ֆոնին։
«Մարդիկ կախված են աշխատավարձից։ Հարկավոր է հետևել, որպեսզի չլինեն չարաշահումներ և մանիպուլյացիաներ` կապված աշխատանքի ժամերի հետ», – ասաց Փաշինյանը։
ՀՀ ֆինանսների նախարար Ատոմ Ջանջուղազյանն արտաքին սպասումներից խուսափելու նպատակով ընդգծեց, որ նվազագույն աշխատավարձի փոփոխությունները չեն նախատեսում բազային աշխատավարձի փոփոխություն, որով հաշվարկվում է պետական հատվածի աշխատակիցների աշխատավարձը։
Հայաստանում նվազագույն աշխատավարձն այսօր կազմում է 55 հազար դրամ։ Վերջին անգամ այն բարձրացվել է 2015թ.–ին։ Ֆինանսների նախարարության տվյալներով, միջին աշխատավարձը 2018թ.–ի արդյունքում կազմել է 172 հազար դրամ, ընդ որում պետական համակարգում միջին աշխատավարձն ավելի ցածր է, քան մասնավոր հատվածում և կազմում է միջինը 149 հազար դրամ` մասնավոր հատվածում գրանցված 186 հազար դրամի համեմատ:-0-