ԵՐԵՎԱՆ, 30 ապրիլի./Նովոստի–Արմենիա/. Հայրենական պատերազմում տարած հաղթանակի 75–ամյակի առթիվ վետերաններից յուրաքանչյուրը կստանա 300 հազարական դրամ։
Այս որոշումն ընդունվեց կառավարության այսօրվա նիստի ժամանակ։
Նախագիծը ներկայացրեց ՀՀ աշխատանքի և սոցիալական հարցերի նախարար Զարուհի Բաթոյանը։
Նա նշեց, որ պարգևատրումը մեկանգամյա է, այն տրամադրվում է որպես գնահատանք վետերանների ունեցած վաստակի և սոցիալական աջակցության միջոցառում։
«Տարեկան բյուջեում վերաբաշխում իրականացնելու միջոցով մենք 86 մլն դրամ ենք հատկացնում այս միջոցառմանը։ Քանի որ արտակարգ դրության ռեժիմով պայմանավորված այս տարի Հաղթանակի տոնին նվիրված միջոցառումներ չեն կազմակերպվելու, այս համեստ պարգևատրումը ևս մեկ անգամ կհիշեցնի վետերաններին, որ կառավարությունն ուշադրության կենտրոնում է պահում իրենց», – նշեց նախարարը։
Բաթոյանը նաև հիշեցրեց, որ 2019թ.–ից կրկնապատկվել է վետերանների ամսական պարգևավճարը` 50 հազար դրամից դառնալով 100 հազար դրամ։
ՀՀ վարչապետ Նիկոլ Փաշինյանն իր հերթին հիշեցրեց, որ այսօր Հայաստանում կա պատերազմի 287 մասնակից, և որոշման արդյունքում նրանցից յուրաքանչյուրը կստանա 300 հազարական դրամ։–0–