Հայաստանը նշել է Ադրբեջանի հետ սահմանազատման և սահմանագծման պայմանները

ԵՐԵՎԱՆ, 1 սեպտեմբերի․/Նովոստի-Արմենիա/․ ՀՀ ԱԳ նախարար Արարատ Միրզոյանը ՌԻԱ Նովոստիiն տված հարցազրույցում խոսել է այն մասին, թե երբ կսկսվեն Հայաստանի և Ադրբեջանի միջև բանակցությունները սահմանազատման և սահմանագծման շուրջ։

Նրա խոսքով, եթե Ադրբեջանը կզբաղեցնի կառուցողական դիրքորոշում և իր զորքը կհանի Հայաստանի սուվերեն տարածքից, այսինքն՝ կվերադառնա այս տարվա մայիսի 11-ի դիրքերին, ապա կստեղծվեն բարենպաստ պայմաններ սահմանազատման և սահմանագծման գործընթացը սկսելու համար։

Նա նաև պատասխանել է այն հարցին, թե կպահպանվի՞, արդյոք, եռակողմ ձևաչափը՝ Ռուսաստանի մասնակցությամբ, թե՞ այդ գործընթացում կարող են ներգրավվել Մինսկի խմբի այլ միջնորդ երկրներ կամ միջազգային կազմակերպություններ, ինչպիսիք են ՄԱԿ-ը կամ ԵԱՀԿ-ն։

«Նշված բանակցություններն ընթանում են ռուսական կողմի անմիջական մասնակցությամբ, և մենք հույս ունենք, որ հնարավոր կլինի գտնել այդ հարցի լուծումն այնպիսի քննարկումների ընթացքում, որոնց դեպքում անհրաժեշտ չի լինի դիմել ձեր կողմից նշված կառույցներին», - ասել է Միրզոյանը։-0-