Կենտրոնի թաղապետարանում տեղի ունեցած ծեծկռտուքի հետքերով. թաղապետի տեղակալն ու աշխատակիցը ձերբակալվել են, հարուցվել է քրգործ

ԵՐԵՎԱՆ, 12 մայիսի./Նովոստի–Արմենիա/. Երևանի Կենտրոն վարչական շրջանի ղեկավարի տեղակալ Արմեն Ազիզյանը և վարչական շրջանի գլխավոր մասնագետ Արման Դավոյանը ձերբակալվել են։ Այս մասին «Նովոստի–Արմենիա» գործակալությանը հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը։ 

Նշենք, որ նախօրեին հայտնի էր դարձել, որ նրանց մասնակցությամբ թաղապետարանում ծեծկռտուք է տեղի ունեցել։

«Հարուցվել է քրեական գործ ՀՀ ՔՕ 309–րդ հոդվածի 2–րդ մասի (Պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով) և ՀՀ ՔՕ 258–րդ հոդվածի 4–րդ մասի (խուլիգանությունը, որի զուգորդվել է անձի առողջությանը միջին ծանրության վնաս պատճառելով) հատկանիշներով», – նշեց Խաչատրյանն` ավելացնելով, որ նրանց նկատմամբ խափանման միջոց դեռ չի կիրառվել:–0–