Քոչարյանը նշել է Հայաստանի առջև ծառացած երեք գլխավոր խնդիրները (ՎԻԴԵՈ)

ԵՐԵՎԱՆ, 9 մայիսի./Նովոստի–Արմենիա/. ՀՀ նախկին նախագահ Ռոբերտ Քոչարյանն Ազատության հրապարակում հանրահավաքի ժամանակ նշեց Հայաստանի առջև ծառացած երեք գլխավոր խնդիրները։

Նշենք, որ Քոչարյանը, «Վերածնվող Հայաստան» կուսակցության առաջնորդ Վահե Հակոբյանն ու ՀՅԴ–ի ներկայացուցիչ Իշխան Սաղաթելյանը ստորագրեցին հռչակագիր «Հայաստան» դաշինքի ստեղծման մասին, որը կմասնակցի հունիսի 20–ին նախատեսված արտահերթ խորհրդարանական ընտրություններին։

Առաջին խնդիրը. անվտանգություն

Քոչարյանը հայտարարեց, որ այսօր Հայաստանն անվտանգ չէ, սպառնալիքի տակ են Սյունիքի սահմանները։

«Այսօր մենք մի երկիր ենք, որը չի կարող սեփական ուժերով պաշտպանել սահմաններն ու բնակչության անվտանգությունը։ Այսօր մենք ունենք իշխանություն, որը հետևողականորեն քանդեց բանակն ու ոչինչ չի անում, որպեսզի այն վերականգնի։ Մեր նպատակն է հաստատել արժանի խաղաղություն», – ասաց նա։

Երկրորդ խնդիրը. Արցախի մշուշոտ ապագան

Քոչարյանը նշեց, որ Արցախի ապագան բավականին մշուշոտ է։ Նա նշեց, որ 2020թ.–ի նոյեմբերի 9–ին ստորագրված հայտարարությունը նախատեսում է, որ 4,5 տարի հետո Ադրբեջանը կարող է հրաժարվել ռուսական խաղաղապահ զորքերից։

«Պետք է գա իշխանություն, որը ի վիճակի կլինի պրոֆեսիոնալ, հպարտ բանակցություններ վարել և հասնել Ղարաբաղի համար բարենպաստ որոշումների», – ասաց նա։

Երրորդ խնդիրը. տնտեսական ճգնաժամ

Երկրորդ նախագահի խոսքով, Հայաստանը գտնվում է տնտեսական ճգնաժամում, նախորդ տարի տնտեսությունը գրանցել է 7,5%–ով անկում։

«Երկիրը խրվել է արտաքին պարտքերի մեջ, չի կատարվել ոչ մի խոստում։ Թռիչքաձև աճին փոխարինեց անկումը», – նշեց նա։–0–