ԵՐԵՎԱՆ, 12 մայիսի./Նովոստի–Արմենիա/. Մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, հայտնում է ՀՀ պաշտպանության նախարարությունը։
«Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ», – նշվում է գերատեսչության հաղորդագրության մեջ։
ՊՆ–ից հայտնում են , որ մամուլում տարածվող տեղեկությունները «Իշխանասարի ուղղությամբ ընթացող մարտերի մասին» չեն համապատասխանում իրականությանը։
«Նման զարգացումների դեպքում պաշտպանության նախարարությունն առաջինը հանդես կգար հայտարարությամբ։ Կոչ ենք անում ձեռնպահ մնալ չճշտված, առավել ևս՝ խուճապ տարածող տեղեկություններ հրապարակելուց», – նշվում է ՀՀ պաշտպանության նախարարության հաղորդագրության մեջ։
Ինչպես հայտնում են հայկական ԶԼՄ–ները, ադրբեջանցիները Սև լճի տարածքում առաջ են եկել և տեղակայվելու փորձ են կատարել։
Լուրը «Ռադիոլուրի» հետ զրույցում հաստատել է Գորիսի փոխքաղաքապետ Մենուա Հովսեփյանը։
Նա նշել է, որ որևէ միջադեպ չի եղել, վիրավորներ չկան։ Ավելի վաղ որոշ լրատվամիջոցներ հայտնել էին, որ Իշխանասարի ուղղությամբ հարձակումներ են եղել։
«Հարձակում չի եղել, ուղղակի գիշերը լավ առաջ են եկել, բայց այս պահին 1–ին բանակային կորպոււսը բանակցություններ է վարում, որպեսզի ադրբեջանական ուժերը հետ գնան դեպի քարտեզով նախատեսված դիրքերը», – ասել է փոխքաղաքապետը։–0–