ԵՐԵՎԱՆ, 20 դեկտեմբերի./Նովոստի–Արմենիա/. Հանրապետության հրապարակում պատրաստվում են Գլխավոր տոնածառի լույսերի վառման հանդիսավոր արարողությանը: Ընթացքի մեջ է նաև ներկայացման գլխավոր փորձը։
Այս մասին նշվում է Երևանի քաղաքապետարանի Facebook–յան էջում։ Հրապարակվել են նաև նախապատրաստական աշխատանքների լուսանկարները։
Ավելի վաղ Երևանի քաղաքապետի տեղակալ Տիգրան Վիրաբյանը հայտնել էր, որ «Ամանոր 2020» միջոցառումները կմեկնարկեն դեկտեմբերի 21-ին՝ ժամը 20:00-ին, Հանրապետության հրապարակում գլխավոր տոնածառի լույսերը վառելու արարողությամբ՝ հայկական երգերի ու համաշխարհային ամանորյա հիթերի կատարումների ներքո:
Երեկոյի անակնկալը կլինի հայ էստրադային երգիչների մասնակցությամբ հետաքրքիր մյուզիքլը:
Գլխավոր տոնածառի լույսերը վառելու արարողությունից հետո Երևանի 2750-ամյակի այգում կբացվի սուրբծննդյան տոնավաճառ, որը կգործի մինչև 2020թ.-ի հունվարի 13-ը: Այստեղ ամեն օր կլինեն հետաքրքիր ծրագրեր. անցկացվելու են մանկական ներկայացումներ և այլ հետաքրքիր նախագծեր: Իսկ գլխավոր տոնածառին քաղաքացիները կմոտենան կառուցվող հատուկ վերգետնյա անցումով, որը հրապարակը կկապի Երևանի 2750-ամյակի այգուն: Իսկ հունվարի 5-ին հատուկ ծրագիր կլինի մանուկների համար։
Կեսգիշերն անց տոնախմբող քաղաքացիներին կմիանա սերբ երաժիշտ Գորան Բրեգովիչն՝ իր երգչախմբով:–0–