ԵՐԵՎԱՆ, 20 մայիսի․/Նովոստի–Արմենիա/․ Երևանի մետրոպոլիտենում այլևս ժետոններ չեն լինի, կգործի QR կոդերով վճարելու տարբերակը։
Այս մասին ասաց Երևանի քաղաքապետի տեղակալ Սուրեն Գրիգորյանը Երևանի քաղաքապետարանի գործակարգավարական խորհրդակցության ժամանակ։
Նրա խոսքով, այս պահին փոխարինվում են մետրոյի չաշխատող անցարգելները:
«Հին անցարգելները, որոնք աշխատում են, դեռևս չեն փոխարինվում, որովհետև նորերը ժետոնային համակարգով չեն աշխատում», – ասաց Գրիգորյանը։
«Մենք ոչ մի կրիտիկական խնդիր չունենք, բայց որոշակի կարգաբերումների հարց ունենք: Այդ կարգաբերումները իրականացնելուց հետո և համոզվելուց հետո, որ ամբողջությամբ նոր անցարգելները պատրաստ են սպասարկելու ուղևորահոսքը, նաև կփոխարինվեն մյուս անցարգելները, որից հետո արդեն այլևս ժետոնով ուղևորավարձի վճարում, տոմսն այլևս ժետոնով չի լինի, այլ կլինի QR կոդերով և պայմանագրով նախատեսված ժամկետներով՝ նաև վճարման այլ միջոցներով՝ բանկային քարտերով և այլն»,- նշեց քաղաքապետի տեղակալը։
Նշենք, որ նախատեսվում է փոխարինել ընդհանուր առմամբ 49 անցարգել: Աշխատանքները կավարտվեն մեկ ամսվա ընթացքում։
Ծանոթացեք լուրերին առաջինն ու քննարկեք դրանք մեր Telegram-յան ալիքում