Մարդիկ հարսանիք են անում, ուտուշ-խմուշ ա. Սասուն Միքայելյանն առաջարկում է թույլատրել 60 մարդու մասնակցությամբ հարսանիքներ

ԵՐԵՎԱՆ, 12 օգոստոսի./Նովոստի-Արմենիա/. ԱԺ «Իմ քայլը » խմբակցության պատգամավոր Սասուն Միքայելյանն այսօր ԱԺ արտահերթ նիստի ժամանակ, անդրադառնալով հանրային միջոցառումներին առավելագույնը 40 հոգու մասնակցությանը, առաջարկել է 40-ի փոխարեն թույլ տալ 60 հոգու մասնակցությունը հարսանիքներին:

«Կամ անել 60 հոգի մենակ հարսանիքի դեպքում, որովհետև մարդիկ հարսանիք են անում, ուտուշ-խմուշ ա: Մենք սպեցիֆիկ ժողովուրդ ենք, մենք մեր հարսանիքները պետք է հնարավորինս շատ մարդկանցով անենք: Կան 100-ավոր մարդիկ, ովքեր նշանվել են, հնարավորություն կտանք մարդկանց, որպեսզի հարսանիքն արվի»,- առաջարկել է նա:

Նա նշել է, որ ինչ վերաբերում է բաց տարածքներին, ապա Հայաստանը միայն Երևանը չէ, մարզերում էլ ցուրտ է, կարող է փակ տարածքներում լինել:

Պարետ Տիգրան Ավինյանը նշել է, որ հետագա հնարավոր փոփոխությունները կախված են լինելու համաճարակային իրավիճակից:

«Եթե դրական տենդենցը պահպանենք, միգուցե հաջորդ քայլով մեղմացումներն ավելի մեծ լինեն, քան ձեր նախանշածը, այսինքն և քանակապես, և փակ տարածքներում համաճարակային իրավիճակը մեզ հնարավորություն կտա ավելի մեծ մեղամոցումների գնալ»,- hայտնել է նա ԱԺ նիստի ժամանակ:

Միքայելյանը շարունակել է պնդել իր առաջարկը՝ միևնույն ժամանակ կարևորելով կանոնների պահպանումը.

«40 ու 60 միջև, չեմ հասկանում, ինչ տարբերություն կա: Էսօրվա դրությամբ ես առաջարկում եմ, ու ճիշտ եմ գտնում, որ 40 արվի 60: էն սահմանափակումները ու հնարավոր խստացումները թող լինեն»,- նշել է Միքայելյանը արձագանքի ժամանակ:

Ավինյանը հակադարձել է, որ նախնական տարբերակով առաջարկվում էր թույլատրել 30 հոգու մասնակցություն. «Ենթադրվում է, որ նույնիսկ հարսանիքներն այս համաճարակային իրավիճակի պայմաններում հնարավորինս նեղ ընտանեկան կազմով պետք է լինեն: Դրական դինամիկայի պահպանման պայմաններում մեղմացումներ կլինեն ու միջոցառումների մասնակիցների թույլատրելի թիվը կավելացվի»,- հայտնել է Ավինյանը: -0-