ԵՐԵՎԱՆ, 22 փետրվարի. /Նովոստի–Արմենիա/. Սանիտարա–ավիացիոն ծառայության առաջին ուղղաթիռը ժամանել է Հայաստան։
Ինչպես նշում է «Զվարթնոց» միջազգային օդանավակայանի պաշտոնական էջում, սա «Armenian Helicopters» ընկերության` «Զվարթնոց»–ում տեղակայվող երրորդ ուղղաթիռն է։
Ավելի վաղ առողջապահության նախարար
Արսեն Թորոսյանը հայտնել էր, որ Հայաստանը սանիտարա-ավիացիոն ծառայության համար ուղղաթիռ է ձեռք բերել։ Armenian Helicopters LLC ընկերության Airbus ուղղաթիռը կօգտագործվի «Շտապօգնության» ծառայությունների համար։
Հայաստանում սանավիացիա հիմնելու վերաբերյալ առողջապահության նախարարը հայտնել էր դեռևս 2018 թվականի դեկտեմբերին։ Նա թռիչք էր իրականացրել Armenian Helicopters LLCընկերության ուղղաթիռներից մեկով, որի հետ ԱՆ–ն պատրաստվում է գործարկել Հայաստանի պատմության մեջ առաջին սանավիացիոն ծառայությունը։
Հայաստանում հիմնադրված «Armenian Helicopters» ընկերությունը 2018թ.–ի հունիսին հայտարարել է թռիչքներ իրականացնելու պատրաստակամության մասին։ Հայաստանի քաղաքացիական ավիացիայի գլխավոր վարչությունն ընկերությանը տրամադրել է օդանավերի շահագործման վկայագիր։ Ընկերությունը նախատեսել է 10մլն դոլարի ներդրումներ իրականացնել առաջիկա երեք տարում և ստեղծել նոր աշխատատեղեր։ Ընկերության գործունեությունը խթանելու համար ՀՀ կառավարությունը 2018 թ.–ի ապրիլի 19–ին տրամադրել է հարկային տուրքերի վճարման արտոնություններ անհրաժեշտ սարքավորումներ ներկրելու համար։–0–
