ԵՐԵՎԱՆ, 20 փետրվարի. /Նովոստի-Արմենիա/. Ռուսաստանի ՆԳՆ «Շերեմետևո» օդանավակայանի Գծային վարչության հերթապահ մաս է դիմել Հայաստանի Հանրապետության քաղաքացի մի կին՝ խնդրելով օգնել իր գոտեպայուսակի որոնման հարցում, որը թողել է Լոս Անջելես-Մոսկվա չվերթի օդանավում. պայուսակի մեջ եղել է 40 հազ. ԱՄՆ դոլար: Այս մասին
հայտնում է ՌԴ ՆԳՆ Կենտրոնական դաշնային շրջանի Տրանսպորտային վարչության մամուլի ծառայությունը:
Այս տեղեկատվությունը ստանալուց հետո տրանսպորտային ոստիկանությունն անմիջապես գնացել է դեպքի վայր, որտեղ այդ պահին նոր են սկսված եղել սրահի մաքրման աշխատանքները, սակայն պայուսակն արդեն այնտեղ չի եղել:
Օպերատիվ-հետախուզական միջոցառումներ անցկացնելու ժամանակ ուրիշի ունեցվածքի հափշտակման մեջ կասկածվել է Երևանից մի ամուսնական զույգ, որը նստած է եղել տուժածի կողքին: Ըստ բորտուղեկցողների, երբ պայուսակի տերը դուրս է եկել օդանավից, նրա հարևանները որոշ ժամանակ մնացել են իրենց տեղերում:
Շուտով նրանց տվյալները ճշտվել են, և Հայաստան նախատեսվող չվերթի գրանցման ժամանակ կասկածյալները ձերբակալվել և ուղեկցվել են հերթապահ մաս: Կինը դժվարությամբ է քայլել՝ պատճառաբանելով վատ առողջական վիճակը, սակայն, ինչպես պարզվել է, նրան քայլել խանգարել են սպորտային կոշիկներում թաքցրած փողերը: Գումարի երկրորդ մասը գտնվել է ամուսնու բաճկոնի ներսի գրպանից:
Ռուսաստանի ՆԳՆ-ի «Շերեմետևո» օդանավակայանի բաժանմունքի կողմից տվյալ քաղաքացիների նկատմամբ քրեական գործ է հարուցվել՝ Ռուսաստանի Դաշնության Քրեական օրենսգրքի 158-րդ հոդվածի 4-րդ մաս (առանձնապես խոշոր չափերի գողություն) հատկանիշներով: Կասկածյալները ձերբակալված են:-0-
