4կգ քաշով տղա. ռուսական խաղաղապահ զորակազմի բժիշկներն առաջին անգամ ծնունդ են ընդունել Արցախի Մարտակերտ քաղաքում (ՖՈՏՈ)

ԵՐԵՎԱՆ, 26 հուլիսի./Նովոստի–Արմենիա/. Ռուսական խաղաղապահ զորակազմի հումանիտար արձագանքման կենտրոնի սպաներն ու հատուկ նշանակության բժշկական ջոկատի ռազմական բժիշկները Լեռնային Ղարաբաղի Մարտակերտ քաղաքի շրջանային հիվանդանոցում կազմակերպված հումանիտար–բժշկական ակցիայի շրջանակում առաջին անգամ տեղի բնակչուհուց ծնունդ են ընդունել, հաղորդում է ՌԴ ՊՆ մամուլի ծառայությունը։

Մարտակերտի շրջանային հիվանդանոց է դիմել հղի կին, ով բողոքել է որովայնի շրջանում առկա ցավերից։ Հիվանդանոցի ադմինիստրացիան, իմանալով, որ հիվանդանոցում և քաղաքում չկա բժշկական մասնագետ, որոշել է դիմել ռուս խաղաղապահ–բժիշկներին։ Հատուկ նշանակության ռուսական բժշկական ջոկատի բժիշկները, ունենալով մեծ փորձ և պրոֆեսիոնալ պատրաստվածություն, որակյալ օգնություն են ցուցաբերել և փրկել են կնոջն ու երեխային։

«Բժշկական ջոկատի համար սա առաջին ծննդաբերությանն է, և այն հաճախ չի կիրառվում ռազմական բժշկության մեջ։ Կեսարյան հատման վիրահատության ժամանակ, ըստ արձանագրության, նորածնին պետք է ընդունի մանկաբույժ–նեոնատոլոգը։ Ես իմ պրոֆեսիոնալ գործունեությունը սկսել եմ որպես մանկական անեսթեզիոլոգ, աշխատել եմ նաև նորածինների հետ։ Ստիպված էի հանդես գալ ոչ միայն որպես անեսթեզիոլոգ, այլ նաև որպես նեոնատոլոգ։ Ծնվեց տղա, մայրիկը հենց վերակենդանացման բաժանմունքում նրան անվանակոչեց Հովհաննես։ Տղան ծնվել է 4կգ 250 գրամ քաշով, 49սմ հասակով», – պատմել է ռուսական խաղաղապահ զորակազմի հատուկ նշանակության բժշկական ջոկատի բժիշկ–անեսթեզիոլոգ Անատոլի Ախապկինը։

«Առավոտյան մեր ծննդկանը դիմեց մեզ` երկունքի ցավերով։ Ես դիմեցի մեր ռուս գործընկերներին։ Նրանք միանգամից արձագանքեցին և արագ եկան հիվանդանոց։ Մենք չունեինք նեոնատոլոգ, բայց բարեբախտաբար ձեր բժիշկները, այնտեղ կար նաև մանկաբույժ, նա մեզ օգնեց, և մենք արեցինք կեսարյան հատում։ Ամեն ինչ անցավ բարեհաջող երեխայի և մայրիկի համար։ Շնորհակալ ենք ռուսական խաղաղապահ ուժերի մեր գործընկերներին։ Նրանց շնորհիվ մենք ամեն ինչ արեցինք ժամանակին», – նշել է Մարտակերտի շրջանային հիվանդանոցի մանկաբարձ–գինեկոլոգ Լուսինե Իսկանդարյանը։–0–