ԵՐԵՎԱՆ, 7 օգոստոսի./Նովոստի-Արմենիա/. Մինչև օգոստոսի 25-ը հայկական կողմը երթևեկելի ճանապարհ կունենա, որը կդառնա այլընտրանքային Լաչինի միջանցքին: Այս մասին հայտնել է Արցախի տարածքային կառավարման և ենթակառուցվածքների նախարար Հայկ Խանումյանը Հանրային հեռուստաընկերությանը տված հարցազրույցում:
«Եթե ռուսական զորախումբը տեղափոխվում է, և ադրբեջանցիները հստակ ասում են, որ գալու են և զբաղեցնելու են բնակավայրերը, բնականաբար, պետության պարտականությունն է հոգալ այդ քաղաքացիների մասին», - ասել է Խանումյանը:
Նրա խոսքով, միջանցքի այլընտրանքային շինարարությունը հայկական կողմը սկսել է օրերս: Հին Շեն, Մեծ Շեն, Կանաչ Թալա ճանապարհահատվածը պատրաստ է: Սահմանից դեպի Կոռնիձոր 11 կիլոմետրանոց հատվածը դեռևս պատրաստ չէ: Օգոստոսի 1-ին նոր տենդեր է եղել Հայաստանում, որի արդյունքում երեք ընկերություններ կսկսեն իրենց հատվածների կառուցումը։
«Ենթադրվում է, որ գործող ճանապարհի փակվելուց հետո, նոր երթուղով՝ Հայաստանի սահմանից 3-4 կիլոմետրանոց գրունտային հատվածով, ժամանակավորապես կփորձենք միանալ Հայաստան տանող մայրուղուն», - ասել է նախարարը:
Հանրային հեռուստաընկերությունը հայտնում է, որ նախարարը ուրբաթ հանդիպել է Բերձոր, Աղավնո և Ներքին Սուս գյուղերի բնակիչների հետ, քննարկվել են վերաբնակեցման հարցերը:
Նրա խոսքով, Լաչինի միջանցքին յլընտրանքային ճանապարհի հարևանությամբ պետք է կառուցվեն նաև Արցախը սնուցող ենթակառուցվածքները, բայց դրանց մեծ մասն անցնելու է Ադրբեջանի վերահսկողության տակ գտնվող տարածքներով:
Խանումյանը նաև հայտարարել է, որ անհրաժեշտ է ռուսական խաղաղապահ անձնակազմի գործուն մասնակցությունն այս ամենը կարգավորելու համար:
Օգոստոսի 4-ին ՀՀ տարածքային կառավարման և ենթակառուցվածքների նախարար Գնել Սանոսյանը հայտարարել է, որ Բերձորի (Լաչինի, որով անցնում է Արցախը Հայաստանին կապող միջանցքը, խմբգր.) այլընտրանքային ճանապարհի շինարարությունը կավարտվի գարնանը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում