ԵՐԵՎԱՆ, 5 օգոստոսի./Նովոստի Արմենիա/. ՌԴ ԱԳՆ-ն հրապարակել է Ռուսաստանի դիրքորոշումը ՄԱԿ-ի գլխավոր վեհաժողովի 76-րդ նստաշրջանում:
Փաստաթղթի կետերից մեկը վերաբերում է Լեռնային Ղարաբաղի հակամարտության գոտում տիրող իրավիճակին:
«Առաջնահերթությունը Լեռնային Ղարաբաղի հակամարտության շրջանում իրադրության կարգավորմանն ուղղված ջանքերի շրջանակներում 2020 թ. նոյեմբերի 9-ի և 2021 թ. հունվարի 11-ի եռակողմ հայտարարությունների իրականացումն է: Օգտակար ենք համարում ռուսական խաղաղապահ օպերացիայի իրականացման գոտում ՄԱԿ-ի գործակալությունների, մասնավորապես, ՄԱԿ-ի փախստականների հարցերով գերագույն հանձնակատարի վարչության (ՄԱԿ ՓԳՀ) ներգրավվումը մարդասիրական գործունեություն իրականացնելու գործում: Նրանց հնարավոր աշխատանքի պարամետրերը պետք է համաձայնեցվեն Բաքվի և Երևանի հետ»,-նշվում է փաստաթղթում, որը հրապարակվել է Ռուսաստանի արտաքին քաղաքական գերատեսչության կայքում:
Արցախյան պատերազմի մասին
2020 թ. սեպտեմբերի 27-ից նոյեմբերի 9-ը Ադրբեջանի զինված ուժերը, Թուրքիայի և նրա կողմից հավաքագրված օտարերկրյա վարձկանների ու ահաբեկիչների մասնակցությամբ, Արցախի դեմ ագրեսիա են իրականացրել ռազմաճակատում և թիկունքում՝ հրթիռահրետանային սպառազինության, ծանր զրահատեխնիկայի, մարտական ավիացիայի և արգելված զինատեսակների (կասետային ռումբեր, ֆոսֆորային զենք) կիրառմամբ: Հարվածները հասցվել են, այդ թվում՝ ՀՀ տարածքի քաղաքացիական և ռազմական օբյեկտներին:
2020 թ. նոյեմբերի 9-ին ՌԴ-ի, Ադրբեջանի և Հայաստանի առաջնորդները հայտարարություն են ստորագրել Արցախում բոլոր ռազմական գործողությունները դադարեցնելու մասին: Ըստ փաստաթղթի, կողմերը կանգ են առնում իրենց զբաղեցրած դիրքերի վրա: Ադրբեջանին են անցնում Շուշիի, Աղդամի, Քարվաճառի և Լաչինի շրջանները՝ բացառությամբ Ղարաբաղը Հայաստանին կապող 5 կիլոմետրանոց միջանցքի: Ղարաբաղա-ադրբեջանական հակամարտ զորքերի շփման գծի երկայնքով, և Լաչինի միջանցքի երկայնքով տեղակայվում է ՌԴ խաղաղապահ զորակազմը: Ներքին տեղահանված անձինք և փախստականները վերադառնում են Ղարաբաղ և հարակից շրջաններ, իրականացվում է ռազմագերիների, պատանդների և այլ անձանց,ինչպես նաև զոհվածների մարմինների փոխանակում:
2021 թվականի հունվարի 11-ին Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը, և Հայաստանի վարչապետ Նիկոլ Փաշինյանը Մոսկվայում չորս ժամ տևած բանակցությունների արդյունքում ստորագրեցին համատեղ հայտարարություն ՝ ուղղված տարածաշրջանի զարգացմանը և հաղորդակցությունների ապաշրջափակմանը:-0-
