Իսկանդարյանը գնահատել է Հայաստանի և Ադրբեջանի միջև լայնամասշտաբ պատերազմի հավանականությունը (ՎԻԴԵՈ)

ԵՐԵՎԱՆ, 26 սեպտեմբերի./Նովոստի–Արմենիա/. Կովկասի ինստիտուտի տնօրեն , քաղաքագետ Ալեքսանդր Իսկանդարյանը գնահատել է Հայաստանի և Ադրբեջանի միջև լայնամասշտաբ պատերազմի հավանականությունը։

«Ադրբեջանցիներն իրենք չգիտեն, թե որքան հեռու կգնան։ Այսօրվա նպատակն Արցախի էթնիկ զտումն է։ Հաջորդ նպատակը նրանց ընկալմամբ այսպես կոչված «Զանգեզուրի միջանցքն է»։ Հետո չգիտեմ, կտեսնենք, թե նրանք որքան սահմանափակված կլինեն ինչ–որ բանով», – ասաց Իսկանդարյանը «Նովոստի–Արմենիա» գործակալության YouTube–յան ալիքով հեռարձակվող «Հատուկ կարծիք» հաղորդաշարի ընթացքում։

Նա նշեց, որ այդ գործընթացները կլինեն ավելի բարդ, քանի որ Հայաստանը միջազգայնորեն ճանաչված պետություն է։

«Բայց ես գիտեմ շատ ճանաչված պետություններ` Սիրիայից մինչև Ուկրաինա, որոնց չօգնեց միջազգային ճանաչվածությունը։ Դա, թերևս, հնարավոր է, բայց չեմ կարծում, որ հավանականությունը չափազանց բարձր է», – ասաց Իսկանդարյանը։

Նա կոչ արեց ամբողջությամբ չբացառել նման հնարավորությունը` հույս դնելով արևմտյան պետությունների երաշխիքների վրա և նշելով, որ դա միամտություն է։–0–