ԵՐԵՎԱՆ, 19 սեպտեմբերի./Նովոստի–Արմենիա/. Հայաստանի գլխավոր դատախազ նախկին տեղակալ Գագիկ Ջհանգիրյանի արդարացումն իրավական պետության լավ օրինակ է, հինգշաբթի լրագրողներին ասաց վարչապետի մամուլի խոսնակ Վլադիմիր Կարապետյանը։
Վճռաբեկ դատարանը սեպտեմբերի 18–ին բավարարեց Հայաստանի գլխավոր դատախազ նախկին տեղակալ Գագիկ Ջհանգիրյանի բողոքը, որում նա պահանջում էր մերժել իրեն 10 տարի առաջ առաջադրված դատական ակտը, ըստ որի նա մեղավոր էր ճանաչվել ոստիկանության աշխատակիցների նկատմամբ ուժի կիրառման համար և դատապարտվել էր 3 տարվա ազատազրկման։ Մեղադրանքի համաձայն, Ջհանգիրյանը, չենթարկվելով իրավապահների պահանջներին, մտել է Ոստիկանության կազմակերպված հանցավորության գլխավոր վարչության վարչական շենք, հարվածել ոստիկանին, ինչպես նաև պատռել մեկ այլ աշխատակցի համազգեստը։
«Մենք շատ վճռական քայլեր ենք ձեռնարկում իրավական պետության ձևավորման ուղղությամբ։ Կարծում եմ, որ դա (Ջհանգիրյանի արդարացումը` խմբ.) կարևոր իրադարձություն է, և նախադեպերը պետք է շարունակվեն, քանի որ կան բազմաթիվ դեպքեր, երբ ինչպես նախորդ իշխանությունները, այնպես էլ նրանց օրոք գործող դատական համակարգն անարդար են վարվել»,– ասաց Կարապետյանը։
Загружается новость ... "Лево"
Նրա խոսքով, դա կարող է լավ օրինակ դառնալ նախկին պաշտոնյաների համար, ովքեր վճռականորեն կպայքարեն իրենց իրավունքների վերականգնման համար, և այս դիրքորոշումը բխում է պետության շահերից։
Այն հարցին ի պատասխան, թե արդյո՞ք Ջհանգիրյանի օրինակին կհետևի Հայաստանի վարչապետ Նիկոլ Փաշինյանը, որը պատիժ է կրել Երևանում 2008 թվականի մարտի 1-2–ի անկարգությունների կազմակերպման մեղադրանքով, Կարապետյանը նշեց, որ այդ հարցում վարչապետն անմասն է մնում։
«Նա սպասում է այլ օրինակների, որ իր դիմումը չդիտարկվի որպես ճնշման հնարավորություն։ Դրանից հետո, հավանաբար, ինչ–որ փուլում նա կարող է և միանալ, և ես խորապես համոզված եմ, որ արդարացում անպայման կլինի։ Ակնհայտ է, որ անօրինական գործողություններ են եղել իրավապահների կողմից, և ես ուրախ եմ, որ պատմության այդ էջերը բացվում են»,– ասաց Կարապետյանը, հույս հայտնելով, որ արդար որոշումներ կկայացվեն։ -0-