Բժշկական պարտադիր ապահովագրությունը Հայաստանում. սկզբունքներ և նպատակներ

ԵՐԵՎԱՆ, 29 նոյեմբերի./Նովոստի-Արմենիա/. Հայաստանում բժշկական համընդհանուր պարտադիր ապահովագրության պետական համակարգը ներկայումս չի գործում։ Դրա ներդրումը նախատեսվում է Առողջապահության նախարարության կողմից մշակված առողջապահական համակարգի զարգացման 5-ամյա ռազմավարության շրջանակում։

Փորձել ենք պարզել, թե ինչ հիմնական նպատակներ և սկզբունքներ են ամրագրված նախագծի հայեցակարգում:

Բժշկական պարտադիր ապահովագրության խնդիրները

• Հիվանդությունների կանխարգելման սկզբունքի կիրառում` առողջապահության ոլորտի՝ տնտեսապես արդյունավետ և որակյալ գործունեության երաշխավորման նպատակով
• Բնակչության բոլոր շերտերի համար հիմնական առողջապահական ծառայությունների հասանելիության ապահովում
• Առողջապահության ֆինանսավորման կայուն համակարգի ձևավորում, որը հիմնված է պետության սոցիալական պատասխանատվության վրա

Առողջապահության նախարարության ռազմավարությունը

Ոլորտի զարգացման 5-ամյա ռազմավարությունը, որը մշակվում է Առողջապահության նախարարության կողմից, միտված է բնակչության առողջության բարելավմանը որակյալ և հասանելի բժշկական ծառայությունների մատուցման միջոցով:

Փաստաթուղթը նախատեսում է մինչև 2027 թվականը բժշկական համընդհանուր պարտադիր ապահովագրության համակարգի փուլային ներդրում` ընդգրկելով բոլոր տեսակի բժշկական ծառայությունները, բացառությամբ ատամնաբուժության և պլաստիկ վիրաբուժության։

Ընդ որում, նախատեսվում են ապահովագրության ինչպես կամավոր, այնպես էլ պարտադիր բաղադրիչներ։

Նախատեսվում է ստեղծել այնպիսի ապահովագրական ենթակառուցվածք, որը թույլ կտա շահառուների բոլոր խմբերին տրամադրել նույն որակի և հասանելիության բժշկական ծառայություններ՝ անկախ սոցիալական կարգավիճակից։

Ներկայումս քննարկվում են ֆինանսական գնահատման և կառավարման մեխանիզմների, ֆինանսավորման աղբյուրների հարցերը և պետության մասնակցության մասշտաբը, ապահովագրավճարների չափը, ինչպես նաև ներդրումային ռիսկերը։



Առողջության ապահովագրություն

Այսօր Հայաստանում գործում է 6 ապահովագրական ընկերություն՝ «Ռոսգոսստրախ-Արմենիա», «Ինգո Արմենիա», «Արմենիա Ինշուրանս», «Նաիրի Ինշուրանս», «Ռեսո Ինշուրանս» և «Սիլ Ինշուրանս», բոլորն էլ մատուցում են առողջության ապահովագրության ծառայություններ (կորպորատիվ փաթեթներ և/կամ անհատական պոլիսներ):

Բուժօգնություն և պետության պարտավորություններ

ՀՀ օրենսդրությանը համապատասխան՝ հանրապետությունում բուժօգնության և բժշկական սպասարկման ֆինանսավորման աղբյուրներն են.

ա) պետական բյուջեից իրականացված հատկացումները
բ) ապահովագրական հատուցումը
գ) մարդկանց ուղղակի վճարումները
դ) ՀՀ օրենսդրությամբ չարգելված այլ աղբյուրները



ՀՀ կառավարությունը պետական բյուջեից հատկացումների հաշվին առողջապահության պետական նպատակային ծրագրերի շրջանակում իրականացնում է բժշկական սպասարկում տրամադրող անձանց բժշկական օգնության երաշխավորված ֆինանսավորում՝ անկախ նրանց կազմակերպաիրավական տեսակներից և սեփականության ձևից։

Բժշկական օգնության, սպասարկման ֆինանսավորումը ապահովագրական հատուցման միջոցով իրականացվում է կնքված ապահովագրական պայմանագրերին համապատասխան:

Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-