ԵՐԵՎԱՆ, 5 հունվարի./Նովոստի-Արմենիա/. Երգչուհի Նիկի Մինաժի և հեռուստաաստղ Քիմ Քարդաշյանի նախկին մենեջեր Անժելա Կուկավսկուն մահացած են գտել իր սիրելիի մեքենայի բեռնախցիկում, գրում է
lenta.ru-ն՝ հղում անելով Variety-ին։
Ըստ աղբյուրների՝ սպանությունը տեղի է ունեցել դեկտեմբերի 22-ին։ Լոս Անջելեսի ոստիկանությունը կալանավորել է 49-ամյա կասկածյալ Ջեյսոն Բարքերին։ Նա մեղադրվում է երկու ծանր հանցագործության մեջ՝ դիտավորյալ սպանության և խոշտանգման։ Նա կկանգնի դատարանի առաջ 2022 թ.-ի հունվարի 12-ին։
Ոստիկանության տվյալներով՝ Բարքերը սպանել է Կուկավսկուն իրենց ընդհանուր տանը, իսկ հետո դիակը դրել է իր մեքենան ու շարժվել դեպի Սիմի Վելլի, որտեղ էլ իրավապահները հայտնաբերել են մեքենան։ Նշվում է, որ աստղերի նախկին մենեջերի մահվան պատճառը գլխի վնասվածքներն են, ինչպես նաև խեղդամահ անելը։ Ըստ որոշ տեղեկությունների՝ օգտագործվել է դանակ և հրազեն։
«Անժելան իսկապես լավագույնն էր: Նա հոգ էր տանում մեզանից յուրաքանչյուրի մասին և անում էր անհնարինը: Նրան շատ ենք կարոտելու, և մենք մեր անկեղծ ցավակցությունն ենք հայտնում ընտանիքին և մտերիմներին այս ամենադժվար պահին»,- լրագրողներին ասել են Քարդաշյան-Ջեներ ընտանիքի անդամները։
Կուկավսկին հինգ երեխա ունի։ Նա իրականացնում էր հաշվապահական հաշվառում և մատուցում էր կառավարման ծառայություններ արտիստների, մարզիկների և ձեռներեցների համար:-0-