Մետրոյի «Բարեկամություն» կայարանից 20–ամյա երիտասարդ է բերման ենթարկվել, նրա մոտ սառք զենքեր կային (ՎԻԴԵՈ)

ԵՐԵՎԱՆ, 26 փետրվարի./Նովոստի–Արմենիա/. Փետրվարի 23-ին, ժամը 20.20-ին, ոստիկանության մետրոպոլիտենի պահպանության բաժնի ծառայողերը մետրոյի «Բարեկամություն» կայարանից, սառը զենք կրելու կասկածանքով, բերման են ենթարկել Երևանի Փափազյան փողոցի բնակիչ, 20-ամյա մի երիտասարդի, հաղորդում է ՀՀ ոստիկանության մամուլի ծառայությունը:

Նրա ձեռքի պայուսակում 10 սանտիմետր շեղբի երկարությամբ դանակ և մետաղյա կռփազենք կար:

Սառը զենքերն առգրավվել են, նշանակվել է դատատեխնիկական փորձաքննություն:

«Չկա վիճակագրություն, թե նման հայտնաբերումներով ծանր և առանձնապես ծանր քանի հանցագործություն է կանխել ոստիկանությունը: Հորդորում ենք մեր քաղաքացիներին, հատկապես՝ երիտասարդներին, չխախտել օրենքը և հասարակական վայրերում չկրել հրազեն, սառը զենք: Հիշեցնենք, որ նման արարքը հղի է իրավական հետևանքներով», – նշվում է ոստիկանության հաղորդագրության մեջ:–0–