Տեսախցիկը ֆիքսել է Երևանում դիտավորյալ վրաերթի կադրերը (ՎԻԴԵՈ)

ԵՐԵՎԱՆ, 11 հունիսի./Նովոստի–Արմենիա/.Հունիսի 7-ի գիշերը վրաերթ էր տեղի ունեցել Ավանում։ Խուդյակովի փողոցի տեսախցիկներից մեկն արձանագրել էր, թե ինչպես է «Օպելի» վարորդը մեքենայով վրաերթի ենթարկում հետիոտնային անցումով փողոցը հատող տղամարդուն, հաղորդում է ՀՀ ոստիկանության մամուլի ծառայությունը։


Վարորդը դեպքի վայրից դիմել էր փախուստի, իսկ վրաերթի ենթարկվածը տեղափոխվել էր թիվ 1 համալսարանական հիվանդանոց։ Նախնական տվյալներով՝ նրա առողջությանը պատճառվել է ծանր վնաս։ Հարուցվեց քրեական գործ։

«Քրեական ոստիկանության գլխավոր վարչության ծառայողները օպերատիվ ճանապարհով փաստական տվյալներ ձեռք բերեցին, որ տեղի ունեցածը անզգուշության հետևանք չէր. «Օպելի» վարորդը դիտավորյալ վրաերթի էր ենթարկել 45-ամյա տղամարդուն։ Պարզեցին նաև կասկածվողի ինքնությունը, իսկ արդեն հունիսի 8-ին Ավանի ոստիկաններըԵրևանի բնակիչ, 48-ամյա տղամարդուն հայտնաբերեցին ու բերման ենթարկեցին։ Նա ձերբակալվել է», – նշվում է գերատեսչության հաղորդագրության մեջ։

Հանցագործության գործիք մեքենան տեղափոխվել է պահպանվող հատուկ տարածք։ Դեպքի առթիվ հարուցված քրեական գործի նախաքննությունը շարունակվում է։–0–