Հրապարակվել են Երևանում գրանցված խոշոր ավտովթարի կադրերը. կա 5 տուժած (ՎԻԴԵՈ)
11:00
16 Փետրվարի 2020
ԵՐԵՎԱՆ, 16 փետրվարի./Նովոստի-Արմենիա/. Հրապարակվել է փետրվարի 14-ին Երևանում գրանցված խոշոր ավտովթարի տեսանյութը, որն արձանագրվել է տեսախցիկների կողմից։
Փետրվարի 14-ին, ժամը 16:10-ի սահմաններում Բագրատունյաց պողոտայում բախվել են Mercedes G 55 մակնիշի և Nissan March ավտոմեքենաները: Բախման հետևանքով Mercedes–ը կողաշրջվել է, Nissan-ն էլ, առաջ ընթանալով, բախվել է ճանապարհի թույլատրելի հատվածում կայանված BMW X5 մակնիշի ավտոմեքենային:
Shamshyan.com-ի հաղորդմամբ, նյութերի նախապատրաստման ընթացքում պարզվել է՝ Mercedes G55 մակնիշի ավտոմեքենան վարել է Երևանի բնակիչ՝ 24-ամյա Գոռ Նալբանդյանը, իսկ կայանված վիճակում գտնվող BMW մակնիշի ավտոմեքենան պատկանում է Արարատի մարզի բնակիչ՝ 38-ամյա Անդրանիկ Վարանյանին։
Կայքի հաղորդմամբ, հիվանդանոց են տեղափոխվել Nissan-ի մեջ գտնվողներ՝ Երևանի բնակիչներ՝ 28-ամյա Արմեն Մկրտչյանը, 29-ամյա Դավիթ Վարդանյանը, 28-ամյա Գայանե Սարգսյանը, ինչպես նաև Mercedes-ի ուղևորներ՝ Երևանի բնակիչներ, 24-ամյա Հայկ Կարապետյանն ու 25-ամյա Մարատ Խաչատրյանը։ Վերջիններս տեղափոխվել են «Էրեբունի» բժշկական կենտրոն։
Ոստիկանությունը պարզում է Nissan-ի վարորդի ինքնությունը։ -0-