Հեռացրեք ձեր կեղտոտ ձեռքերը Թուրքիայից. Թուրքիայի ՆԳՆ ղեկավարը՝ ԱՄՆ դեսպանին

ԵՐԵՎԱՆ, 3 փետրվարի./Նովոստի-Արմենիա/. Թուրքիայի ներքին գործերի նախարար Սուլեյման Սոյլուն ուրբաթ մեղադրել է ԱՄՆ-ին Եվրոպան կառավարելու մեջ և կոչ է արել չփորձել իրենց գործողություններով խռովություններ առաջացնել Թուրքիայում։ Այս մասին հայտնում է ՏԱՍՍ-ը։

«Յուրաքանչյուր ամերիկացի դեսպան իրեն հարց է տալիս, թե ինչպես կարող է վնասել Թուրքիային։ Սա եղել է Թուրքիայի ամենամեծ դժբախտություններից մեկը երկար տարիներ։ Նա հավաքում է այլ դեսպանների և փորձում է խորհուրդ տալ նրանց։ Նույնը անում են Եվրոպայում, ամերիկյան դեսպանատունը ղեկավարում է Եվրոպան։ Նրանք մտածում էին, թե ինչ կարող են նախագծել Թուրքիայում, բայց մի մարդ փչացրեց նրանց խաղը, դա Ռեջեփ Թայիփ Էրդողանն է։ Ես այստեղ Ամերիկայի դեսպանին ասում եմ, որ գիտեմ, թե որ լրագրողներին է նա հանձնարարել։ Հեռացրեք ձեր կեղտոտ ձեռքերը Թուրքիայից, ես հստակ գիտեմ, թե ինչ քայլեր եք ձեռնարկել և ինչպես եք ցանկանում խռովություններ առաջացնել Թուրքիայում»,- ասել է Թուրքիայի ՆԳՆ ղեկավարը։

Ուրբաթ Թուրքիայի արտգործնախարար Մևլյութ Չավուշօղլուն մեղադրել է մի շարք արևմտյան երկրների, որոնք Թուրքիայում փակել են հյուպատոսություններն անվտանգության սպառնալիքների պատճառով: Չավուշօղլուն նրանց մեղադրել է դաշնակցային պարտավորությունները չկատարելու մեջ։

Ավելի վաղ Թուրքիայի ԱԳՆ են կանչվել դիվանագիտական առաքելությունների ղեկավարները, այդ թվում՝ այն պետությունների, որոնք դադարեցրել են իրենց գլխավոր հյուպատոսությունների աշխատանքը (Բելգիա, Մեծ Բրիտանիա, Գերմանիա, Իտալիա, Նիդեռլանդներ, ԱՄՆ, Ֆրանսիա, Շվեյցարիա և Շվեդիա)։ ԱԳՆ-ում ընդգծել են, որ Թուրքիայի բոլոր դիվանագիտական հաստատությունների անվտանգությունն ապահովվում է միջազգային պայմանագրերի հիման վրա։ Դեսպանների ուշադրությունը հրավիրվել է նաև ահաբեկչության դեմ պայքարում համագործակցության անհրաժեշտության վրա։ ԱԳՆ-ն մատնանշել է, որ արևմտյան երկրների կողմից կիրառվող մոտեցումը ծառայում է ահաբեկչական կազմակերպությունների շահերին։

Դեսպաններն ԱԳՆ են կանչվել Սոյլուի հայտարարությունից հետո այն մասին, որ մի շարք արևմտյան երկրներ «հոգեբանական պատերազմ» են սանձազերծել Թուրքիայի դեմ՝ ահաբեկչական սպառնալիքի պատրվակով փակելով դիվանագիտական ներկայացուցչությունները և չտրամադրելով որևէ ապացույց։ -0-