Սպորտով զբաղվելու կամ հեծանիվ քշելու կարելի է դուրս գալ միայն որոշակի ժամերին․ պարետի նոր որոշումը

ԵՐԵՎԱՆ, 6 ապրիլի․ /Նովոստի-Արմենիա/․ Պարետի N 34 որոշմամբ՝ փոփոխվել է քաղաքացիների տեղաշարժի սահմանափակման պայմաններում սպորտով ֆիզիկական վարժություններ կամ հեծանվավարություն իրականացնելու կարգը։ Այս մասին ասվում է Պարետի համապատասխան որոշման 2-րդ կետում, այն է՝ «Հավելված N 1-ի 5-րդ կետի 2-րդ ենթակետում «օրվա ընթացքում մեկ անգամ» բառերը փոխարինել «առավոտյան ժամը 6:00-ից մինչև 10:00-ը» բառերով»:

Այսպիսով, ստացվում է, որ ըստ պարետի նոր որոշման՝ սպորտով զբաղվել կամ հեծանիվ քշել կարելի է բացառապես առավոտյան ժամը 6:00-ից մինչև 10:00-ը։ Նախկինում կարելի էր օրվա ընթացքում մեկ անգամ դուրս գալ սպորտով զբաղվելու՝ առանց ժամային սահմանափակման։

Հիշեցնենք, այդ դեպքերում նույնպես պետք է ձեզ հետ ունենաք անձը հաստատող փաստաթուղթ և տեղաշարժման թերթիկ։


Մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ:

Ապրիլի 6-ի դրությամբ՝ Հայաստանում կա կորոնավիրուսով վարակման 833 հաստատված դեպք։ Բուժվել է 62 մարդ, այս պահին փաստացի բուժում է ստանում 763 պացիենտ, բացասական թեստերը` 4096, 8 մարդ, ցավոք, մահացել է։ -0-