ԵՐԵՎԱՆ, 25 հունիսի. /Նովոստի–Արմենիա/. Վրաստանի հյուրանոցների և ռեստորատորների ասոցիացիայի ղեկավար Շալվա Ալավերդաշվիլին Էկոնոմիկայի նախարարությանը և զբոսաշրջության ոլորտի ներկայացուցիչներին առաջարկ է ներկայացրել Բաքվի, Երևանի օդանավակայաններից և Տրաբզոնից անվճար ավտոբուսներ տրամադրել ռուս զբոսաշրջիկների տեղափոխման համար։ Այդ մասին հայտնում է
РБК–ն` հղում անելով վրացական Առաջին ալիքին։
«Փաստաթղթի հիմնական թեման հետևյալն է` որ մոտակա օդանավակայաններում, Բաքվում, Երևանում և Տրաբզոնում տեղակայվեն անվճար շաթլեր, որոնք կտեղափոխեն ռուս զբոսաշրջիկներին Վրաստան»,– պատմել է Ալավերդաշվիլին։
Նա ավելացրել է, որ կարևոր թեմա է հավելյալ չարթերային չվերթերի կազմակերպումը։ Որոշ պետություններ արդեն իրենց պատրաստակամությունն են հայտնել, այդ թվում` Մերձբալթյան երկրները, Ուկրաինան և Ղազախստանը, նշել է Ալավերդաշվիլին։
Ռուսաստանի նախագահ Վլադիմիր Պուտինը հունիսի 21–ին հրաման է ստորագրել, որով արգելել է հուլիսի 8–ից ռուսական ավիաընկերություններին տեղափոխել քաղաքացիներին Վրաստան։ Ավելի ուշ Տրանսպորտի նախարարությունը հայտնել է, որ նույն օրվանից վրացական փոխադրողներին կարգելվի թռիչքներ իրականացնել դեպի Վրաստան։ -0-