ԵՐԵՎԱՆ, 23 մայիսի./Նովոստի–Արմենիա/. Արցախի նորընտիր նախագահ Արայիկ Հարությունյանը Facebook–յան իր էջում գրառում է կատարել` շնորհավորելով դպրոցների շրջանավարտներին։
«Աշխարհին պատուհասած համավարակը, ցավոք, այս տարի բոլորիս զրկել է «Վերջին զանգի» տոնական միջոցառման կազմակերպումից: Համոզված եմ, սակայն, որ իրավիճակի հետևանքով առաջացած հիասթափությունը որևէ կերպ չի խանգարելու, որ ձեզանից յուրաքանչյուրն իր առջև դրված նպատակներին հասնելու համար անհրաժեշտ ջանքեր գործադրի: Մի՛ մոռացեք, որ ցանկացած ճգնաժամ նաև հնարավորություն է», – նշել է նա:
Նա ասել է, որ դպրոցն ավարտելուց հետո կյանքում սկսվում է շատ կարևոր մի շրջափուլ, որտեղ որակի ու արդյունավետության չափման միավորները կրկին գիտելիքների մակարդակն ու ցուցաբերած հմտություններն են լինելու:
«Ուստի, ինչ մասնագիտություն էլ կյանքում ընտրելու լինեք, միշտ հիշե՛ք, որ ձեր ոլորտում պետք է լինեք առաջատարը: Մեր նախընտրական խոստման համաձայն՝ սեպտեմբերի 1-ից Արցախում բարձրագույն կրթությունը կդառնա անվճար: Սակայն մեկ անգամ ևս հաստատում եմ, որ կրթության որակի նկատմամբ խիստ են լինելու նաև պետության պահանջները: Հետևապես, սովորելու և անընդհատ կատարելագործվելու ցանկությունը թող երբեք չլքի ձեզ», – ընդգծել է Արցախի նախագահը:
Նա «Վերջին զանգի» առթիվ շնորհավորել շրջանավարտներին և ր ուսուցիչներին՝ մաղթելով, որ իրականանան բոլոր երազանքներն ու մտահղացումները՝ հանուն անհատական և բոլորիս հավաքական հաջողությունների:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
