Տավուշում նախօրեին կորած 57–ամյա տղամարդը հայտնաբերվել է

ԵՐԵՎԱՆ, 16 ապրիլի./Նովոստի–Արմենիա/. Ապրիլի 15-ին, ժամը 02:20-ին Ճգնաժամային կառավարման ազգային կենտրոն տեղեկություն է ստացվել, որ Տավուշի մարզի Բերդ համայնքի Այգեստան փողոցի տներից մեկի բնակիչը (Արամ Ծ., ծնված 1963 թ.) մեկնել է «Եղիշավան» կոչվող հանդամաս և չի վերադարձել, հաղորդում է ՀՀ ԱԻՆ Փրկարար ծառայությունը:

Դեպքի վայր է մեկնել ԱԻՆ ՓԾ մարզային փրկարարական վարչության օպերատիվ խումբը: 

Փրկարարները, ոստիկանության 5 աշխատակից և 30 բնակիչ «Եղիշասար» կոչվող հանդամասում իրականացրել են որոնողական աշխատանքներ:

«Ապրիլի 15-ին, ժամը 09:00-ին կորած քաղաքացու որոնողական աշխատանքները վերսկսելու նպատակով դեպքի վայր են մեկնել ԱԻՆ ՓԾ մարզային փրկարարական վարչության օպերատիվ խումբը և քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի Տաուշի հատուկ օբյեկտների պահպանության հրշեջ-փրկարարական ջոկատի Այգեպարի և Ներքին Կարմիրաղբյուրի հենակետերից 20 փրկարար ծառայող», – նշվում է գերատեսչության հաղորդագրության մեջ:

Մոտ 50 կմ շառավղով որոնողական աշխատանքներ են ծավալվել Բերդ համայնքի «Եղիշավան», «Պողոսի տղուտ», «Դյուզեր», «Ճիկլոպնի», «Չխուր», «Գյոռեր» և «Քրքրուտ» կոչվող հանդամասերում:

Որոնողական աշխատանքներին ներգրավվել են 23 փրկարար ծառայող, ոստիկանության Բերդի բաժնի 4 աշխատակից և համայնքի 20 բնակիչ:

Ժամը 20:00-ին տեղեկատվություն է ստացվել այն մասին, որ քաղաքացին անվնաս հայտնաբերվել է Բերդ համայնքի «Պառավի պունկտ» կոչվող հանդամասում:–0–