Հայաստանը զբաղեցրել է երրորդ տեղը «Մանկական Եվրատեսիլ 2023»–ում (ՎԻԴԵՈ)

ԵՐԵՎԱՆ, 26 նոյեմբերի․/Նովոստի–Արմենիա/․ Ֆրանսիայի Նիցցա քաղաքում այսօր կայացած «Մանկական Եվրատեսիլ 2023» երգի ամենամյա մրցույթում Հայաստանը զբաղեցրել է երրորդ տեղը՝ վաստակելով 180 միավոր։

Մրցույթի արդյունքներն ամփոփվել են 16 ազգային ժյուրիների քվեարկության և 175 երկրներում առցանց քվեարկության արդյունքների հիման վրա։ Մալթան, Մեծ Բրիտանիան, Հյուսիսային Մակեդոնիան և Գերմանիան Հայաստանին տվել են 12 միավոր, իսկ առցանց քվեարկության արդյունքներով մեր երկիրը ստացել է ևս 64 միավոր։

Հայաստանն իր առավելագույն 12 միավորը շնորհեց Մալթային։ Ֆրանսիան երկրորդ տարին անընդմեջ հաղթեց մրցույթում, երկրորդ տեղում Իսպանիան է։

Հայաստանը ներկայացնող «Yan Girls» խումբը ելույթ ունեցավ 8–րդը՝ ներկայացնելով «Do It My Way» անգլալեզու ստեղծագործությունը։–0–