ԵՐԵՎԱՆ, 20 հոկտեմբերի./Նովոստի–Արմենիա/. ՄԱԿ–ի Անվտանգության խորհուրդը քննարկել է Լեռնային Ղարաբաղում կրակի դադարեցման ռեժիմի վերահսկման ապահովումը։
Այս մասին,
ՏԱՍՍ–ի հաղորդմամբ, լրագրողներին է հայտնել ՄԱԿ–ում ՌԴ մշտական ներկայացուցիչ Վասիլի Նեբենզյան` ամփոփելով Ղարաբաղի հարցով ՄԱԿ–ի փակ նիստի արդյունքները։
«Հիմա անհրաժեշտ է ապպահովել կատարումը (կրակի դադարեցման, խմբգր.), սա ամենաօրհասական հարցն է, քանի որ համապատասխան համաձայնություն ձեռք է բերվել, սակայն չի պահպանվել։ Գլխավոր հարցն է` ինչպես ապահովել այդ համաձայնության կատարման վերահսկողությունը», – նշել է նա։
«Այդ հարցը, իհարկե, քննարկվել է խորհրդակցությունների ընթացքում, և Խորհուրդը բավականին միասնական էր իր մոտեցումներում», – նշել է մշտական ներկայացուցիչը։
Նա նաև պարզաբանել է, որ տարածաշրջան ՄԱԿ–ի առաքելության դիտորդներ ուղարկելու համար «կպահանջվեր Անվտանգության Խորհրդի հատուկ մանդատ»։
«Դա արագ գործընթաց չէ», – նշել է դիվանագետը։
«Եղել են տեղեկություններ այն մասին, որ ՌԴ պաշտպանության նախարարը Հայաստանի և Ադրբեջանի գործընկերների հետ քննարկել է այն, թե ինչպես այդ վերահսկողությունը կարող էր իրականացվել», – նշել է Նեբենզյան։
Դիվանագետը չի բացառել, որ դիտորդական առաքելությամբ կարող է զբաղվել ԵԱՀԿ–ն, ավելին, որ այդ կազմակերպությունը զբաղվում է կարգավորման գործընթացով։
«Ով այնտեղ կլինի, ինչ կարգավիճակով, այդ ամենը դեռ քննարկվում է», – ավելացրել է նա։
Արցախում իրավիճակի սրացման մասին
Սեպտեմբերի 27–ին ժամը 07։10–ին Ադրբեջանի ԶՈւ–ն լայնածավալ գործողություններ է սկսել Արցախի շփման գծի ողջ երկայնքով։ Հայաստանի և Արցախի ՊՆ–ների հաղորդմամբ, հակառակորդը սկսել է օդային և հրթիռային հարձակումներ, սակայն հետ է ամղվել մի քանի ուղղություններով։ Ադրբեջանական կողմը կրել է կենդանի ուժի մեծաքանակ կորուստներ, կորցրել է նաև մեծ քանակի տեխնիկա։
Հայկական կողմը միջազգային հանրությանը, այդ թվում ՝ ԵԱՀԿ ՄԽ համանախագահներին, տեղեկացրել է Արցախի դեմ Ադրբեջանի կողմից իրականացված ագրեսիայի, այդ թվում՝ խաղաղ բնակավայրերի հրթիռակոծման մասին:\
Արցախի և Հայաստանի ՊՆ–ների հաղորդմամբ, հայկական կողմից զոհվել է 500-ից ավելի զինծառայող, կան բազմաթիվ վիրավորներ։ Արցախում և Հայաստանում հայտարարվել է ռազմական դրություն և համընդհանուր զորահավաք։
Հոկտեմբերի 18–ին ժամը 00։00–ին ղարաբաղյան հակամարտության գոտում ուժի մեջ է մտել հումանիտար զինադադարի մասին պայմանավորվածությունը: Սակայն Ադրբեջանը կրկին խախտել է պայմանավորվածությունն ու անցել հարձակման։–0–