Հենրիխ Մխիթարյանը կարող է հեռանալ «Ռոմայից», նրանով հետաքրքրվում է մեկ այլ իտալական ակումբ

ԵՐԵՎԱՆ, 10 նոյեմբերի./Նովոստի–Արմենիա/. Իտալական «Միլանը» հունվարյան տրանսֆերային պատուհանի ընթացքում կարող է կրկին ակտիվացնել հայ կիսապաշտպան Հենրիխ Մխիթարյանի տրանսֆերը ձեռք բերելու հետաքրքրությունը, հաղորդում է armsport–ը։

Sempremilan-ը գրում է, որ MilanLive-ի վերջին տեղեկությունների համաձայն, ռոսոներիները կենտրոնացած են այնպիսի խաղացողների տրանսֆերների վրա, ինչպիսիք են «Բրեստի» ֆուտբոլիստ Ռոմեն Ֆևրը և «Ռիվեր Փլեյթի» հարձակվող Ալվարեսը, բայց եթե Մխիթարյանին ձեռք բերելու հնարավորություն ընձեռվի, նրանք կփորձեն ձևակերպել հայ ֆուտբոլիստի տրանսֆերը:

Հիշեցնենք, որ իտալական մամուլը, և, մասնավորապես La Gazzeta dello Sport-ը, երեկ գրել էին, որ Հայաստանի հավաքականի կիսապաշտպան Հենրիխ Մխիթարյանը հնարավոր է հեռանա «Ռոմայից»։

Աղբյուրը նշում է, որ ֆուտբոլիստի շրջապատում դժգոհություններ կան Մխիթարյանի՝ թիմում այժմ առկա իրավիճակի հետ կապված։ Նշվում է, որ թիմի գլխավոր մարզիչ Մոուրինյուն խնդրել է ֆուտբոլիստին ավելի հաճախ պաշտպանողական գործողություններին մասնակցել՝ այսպիսով փոխելով Հենրիխի դերը խաղադաշտում։ Աղբյուրը նաև ավելացնում է, որ ՄՅՈՒ-ից հետո մինչ այժմ Մխիթարյանի և «Յուրահատուկի» հարաբերությունները դրական առաջընթաց չեն գրանցել, և եթե հունվարին Մխիթարյանը համապատասխան առաջարկ ստանա, ֆուտբոլիստը կարող է լքել հռոմեական ակումբը։ 32-ամյա ֆուտբոլիստի պայմանագիրը «Ռոմայի» հետ ավարտվում է 2022թ ամռանը։