Միկրոբիզնեսը հունվարի 1–ից կազատվի հարկերից. ՀՀ վարչապետ

ԵՐԵՎԱՆ, 15 նոյեմբերի./Նովոստի–Արմենիա/. Բոլոր ՀԴՄ-ները պետք է խփվեն և եթե պարզվի, որ հարկ վճարելու հետ կապված մարդը միկրոբիզնեսում է՝ նրանից ոչ ոք հարկ չի պահանջի, իսկ երբ անցնի այդ սահմանաչափը՝ նա պարտավոր է հարկերը վճարել:

Այս մասին այսօր հայտարարել է ՀՀ վարչապետ Նիկոլ Փաշինյանն ԱԺ–ում 2020 թ.–ի պետբյուջեի քննարկումների ժամանակ։

«Եվ ուզում եմ արձանագրենք, որ 2020 թ. չլինեն այն խոսակցությունները, թե գիտեք՝ այդ ընկերությանը, որ տուգանել են ՀԴՄ չխփելու համար, այնքան էլ հնարավորություն չունի, ինքը փոքր բիզնես է, ինքը խեղճ է: Եթե խեղճ է, առավելևս պետք է ՀԴՄ խփի, որ այդ ՀԴՄ-ն ցույց տա, որ նա միկրոբիզնես է: Եթե ինքը ՀԴՄ չի խփում, ինքը գողանում է զինվորից, ինքը գողանում է բանակից, ինքը գողանում է թոշակառուից, ինքը գողանում է ուսուցչից: Հետևաբար, այս գողությունը պետք է պատժվի», – հայտարարել է ՀՀ վարչապետը`նշելով, որ այն մարդիկ, ովքեր միկրոբիզնես են, հունվարի մեկից ազատվում են հարկերից:

«Իրենք բոլորը պետք է ՀԴՄ-ն խփեն, որպեսզի տարին ցույց տա, որ 24 մլն-ից ցածր է շրջանառությունը և մենք իրենից հարկեր չենք ուզելու, իսկ նրանք, ովքեր բարձր են, հարկ չվճարելու ոչ մի պատճառ չունեն»,– նշել է վարչապետ Փաշինյանը:–0–