Լոբստեր–հեռախոս և երկարաոտք փղեր. Երևանում կայացավ «Դալի և Պիկասո» ցուցահանդեսի նախաբացումը (ՖՈՏՈ, ՎԻԴԵՈ)

ԵՐԵՎԱՆ, 6 մարտի./Նովոստի–Արմենիա/. Հայաստանի ազգային պատկերասրահում տեղի ունեցավ «Դալի և Պիկասո» ցուցահանդեսի նախաբացումը, որը կարելի է համարել այս տարվա  ամենասպասված մշակութային իրադարձությունը։



Ինչպես լրագրողներին նշեց ցուցահանդեսի համակարգող Լիլիթ Դավթյանը, ցուցանմուշներում ներառված է մեծանուն նկարիչների մոտ 260 աշխատանք, որոնց թվում են գրաֆիկական և կավագործական աշխատանքներ, քանդակներ։



«Մենք ներկայացնում ենք բավականին մասշտաբային ցուցահանդես ութ սրահներում։ Կան աշխատանքներ, որոնք չեն ներառվել ցուցանմուշներում, քանի որ տեղը չբավարարեց։ Այստեղ կան մոտ 260 աշխատանքներ, որոնցից շատերը ստեղծվել են Սալվադոր Դալիի կողմից` քանդակներ և գրաֆիկական աշխատանքներ։ Իսկ Պիկասոն ներկայացված է 30 կերամիկական աշխատանքներով և 29 գրաֆիկական դիմանկարներով», – ասաց նա։



Դավթյանը նաև նշեց, որ ցուցահանդեսին ներկայացված են նաև աֆիշներ և լուսանկարներ, որոնք նվիրված են նկարիչների ցուցահանդեսներին։



Հայաստանի ազգային պատկերասրահի տնօրեն Արման Ծատուրյանն իր հերթին նշեց, որ հավաքածուն պատկանում է բարերար և կոլեկցիոներ Ալեքսանդր Շադրինին, որը իր կյանքի մոտ 10 տարին նվիրել է Դալիի և Պիկասոյի աշխատանքների ուսումնասիրությանը։ Նա նշեց, որ Հայաստան է բերվել ցուցահանդեսի պատրաստի կոնցեպտը։



Պատասխանելով այն հարցին, թե ներկայացված աշխատանքները բնօրինակներն են, թե ոչ` Ծատուրյանը հայտարարեց, որ բոլոր փաստաթղթերն առկա են։



«Ես միշտ ասել եմ` հավատացեք փորձագիտական կարծիքին։ Եվ ես ոչ մեկին թույլ չեմ տա խաղալ Հայաստանի ազգային պատկերասրահի համբավի հետ», – հայտարարեց նա։

«Որպես կանոն, Դալիի և Պիկասոյի նկատմամբ հետաքրքրությունն աշխարհում շատ մեծ է, և Հայաստանը բացառություն չէ։ Մենք ամեն օր ստանում ենք մեծ քանակով զանգեր», – ասաց նա։

Նրա կանխատեսմամբ, երկու ամսում ցուցահանդես կայցելի մոտ 50–60 հազար այցելու, սպասվում է, որ օրական կայցելի մոտ 500–1500 մարդ։

Բարերար և հավաքածուի կոլեկցիոներ Ալեքսանդր Շադրինը «Նովոստի–Արմենիա» գործակալության թղթակցի հետ զրույցում նշեց, թե ինչու է որոշել ցուցահանդես կազմակերպել հենց Հայաստանում։

«Հասկանում եք` ինչ է նշանակում հեռանալ Մոսկվայից։ Մոսկվան դա 15 հատ Երևան է, այդուհանդերձ ես այս ցուցահանդեսը բերեցի այստեղ։ Ինձ չէր հետաքրքրում ֆինանսական բաղադրիչը, պետք է, որպեսզի մեր երկրների հարաբերությունները զարգանան ավելի վստահելի հունով», – ասաց նա։

Շադրինը կարծում է, որ Դալին և Պիկասոն իսպանական մշակույթի մեդալի երկու կողմերն են։

«Դալին Դոն Կիխոտն է, իսկ Պիկասոն` Սանչո Պանսան», – նշեց բարերարը։–0–